|
||||
| Davíð Oddsson varar við hryðjuverkalögunum sem Hollendingar munu setja í kjölfar Kastljóssviðtals |
 Í viðtali við Kastljós í gærkvöld varaði Davíð Oddsson, seðlabankastjóri, við því að Hollendingar myndu beita hryðjuverkalögum á Íslendinga að viðtalinu loknu.„Það er margt sem ég hef varað við síðustu ár og það hefur alltaf reynst hárrétt. Menn hafa komið til mín og þakkað mér fyrir störf mín og sagt að ég hafi verið sá eini sem hafi varað við þessu öllu. Og af gefnu tilefni vil ég vara við því að Hollendingar munu beita hryðjuverkalögum á Íslendinga þegar þessari útsendingu lýkur og þátturinn Gilmore Girls hefst,“ sagði Davíð í viðtalinu. Fjórir mánuðir eru liðnir síðan Davíð kom síðast fram í opinberu viðtali. Hann ræddi við Sigmar Guðmundsson, fréttamann Kastljóss, um meðal annars seðlabankafrumvarpið umdeilda, stöðugar árásir gegn persónu hans og starfi og hann gagnrýndi jafnframt nýja ríkisstjórn harkalega fyrir að stappa ekki stálinu í þjóðina. „Það er enginn að tala kraft í fólkið! Það er enginn að gera neitt! Það þarf að hjálpa þeim sem eru í erfiðleikum og hugsa um fólkið. Og Hollendingar munu beita hryðjuverkalögum á Íslendinga þegar þessu viðtali lýkur.“ Þegar Davíð hafði lokið máli sínu um væntanleg hryðjuverkalög Hollendinga spurði Sigmar ákveðinn: „Hvað finnst þér um að mér og mörgum öðrum finnist þú vera lélegur bankastjóri?“ Því fékkst ekki nánari útlisting á hvers vegna nákvæmlega Hollendingar munu beita hryðjuverkalögum en spennandi verður að fylgjast með hver framvinda málsins verður. Hollensk stjórnvöld hafa ekki viljað tjá sig um málið að svo stöddu. |
