|
||||
| Hvölum algjörlega nóg boðið |
 Íslenskir hvalir hafa snúið vörn í sókn og fara nú hamförum úti fyrir Íslandsströndum, þar sem þeir gleypa hvert skipið á fætur öðru, milli þess sem þeir öskra hamstola til himins og steypa sér í freyðandi hafið. Ósköpin hófust í gærmorgun þegar Hvalur 7 vaggaði á lygnum sæ skammt úti fyrir Tálknafirði. Réðust þá skyndilega að skipinu þrjár tröllauknar skepnur og gleyptu skipið. Síðan þá hafa að minnsta kosti fjórtán skip horfið í gin hvalanna.„Séu menn eða dýr beitt órétti til lengdar er það náttúrlega bara tímaspursmál hvenær mennirnir eða dýrin taka málin í sínar hendur og rísa gegn mótlætinu,“ segir Susan Lavander, talsmaður alþjóðlegu náttúruverndarsamtakanna Greenpeace. „Það sem við erum að sjá í tilviki hvalanna er ósköp skýrt dæmi um þetta. Hvalir eru mjög mikilvæg og falleg dýr, sem enginn ætti að veiða. Með þessu setja hvalirnir ákveðið hnattrænt fordæmi, sem vonandi verður öðrum þjóðum fordæmi í framtíðinni.“  Kristján Loftsson, forstjóri Hvals hf., segir ástandið slæmt, en þó sé öll von ekki úti enn. „Hvalirnir, sem allajafna eru friðsamar skepnur, hafa að þessu sinni ákveðið að mæta hörðu með hörðu. Þetta setur vissulega strik í reikninginn, einkum svona rétt fyrir kosningar. Ég er þó vongóður um að úr þessu skýrist, enda þarf ég að afgreiða allnokkrar pantanir af hval til Japans um mánaðarmótin. Við sjáum hvað setur.“ Íslendingar hófu á síðasta ári hvalveiðar að nýju, alþjóðasamfélaginu til mikillar gremju. Hvalveiðar höfðu verið stundaðar á Íslandi í aldanna rás, en náðu hámarki á 19. öld og fyrri hlutu hinnar tuttugust, einkum vegna mikillar eftirspurnar á lýsi, sem unnið er úr hvalspiki. Alþjóðahvalveiðiráðið lagði blátt bann við öllum hvalveiðum árið 1986, en sú ákvörðun hefur allt tíð verið mjög umdeild, og ýmsar þjóðir hunsað bannið. Ríkisstjórnin fundaði í morgun og sendi í kjölfarið út tilkynningu um að íslensk skip skyldu halda sig til hafna meðan úr deilunni greiðist. |
