|
||||
| Singstar: Sigur Rós væntanlegur á markað |
|
Steven Patterson, framkvæmdastjóri London Studio, sem hanna Singstar-leikina, kveðst afar spenntur. Hann segist hafa miklar væntingar í tengslum við útgáfu Singstar: Sigur Ros. „Fyrst ætluðum við reyndar að fá Genesis í samstarf og gefa út Singstar: Genesis, en það strandaði vegna einhverra lagaflækja, svo að töluðum við strákana í Sigur Rós, sem voru valkostur númer tvö, og þeir tóku hreint afskaplega vel í þetta.“
Georg Hólm, bassaleikari Sigur Rósar, segir þetta frábært tækifæri til að ná til breiðari hóps af tónlistaráhugamönnum. „Fyrst og fremst er náttúrlega bara frábært að vita að fólk sé að syngja lögin okkar,“ sagði Georg. „En fólk hefur reyndar mikið verið að syngja með okkur á tónleikum í gegnum tíðina.“
Fjölmargir aðdáendur hljómsveitarinnar um allan heim ættu að gleðjast því að geta nú loks sungið með lögum eins og „Heysátan“, „Starálfur“ og „Ónefnt 6“.
Söngfuglar víðsvegar um heiminn hafa undanfarin ár sameinast um ýmsar útgáfur Singstar-tölvuleiksins. Í leiknum keppa tveir eða fleiri í því að syngja skemmtileg og vinsæl lög og sá vinnur sem uppsker flest stig. Auk hinna áðurnefndu Singstar: Aerosmith og Singstar: ABBA, hafa til að mynda komið út titlar á borð við Singstar: 80's, Singstar: Rock, Singstar: Rock Ballads, Singstar: Hits, Singstar: Pop og Singstar: Disney. Útgáfa Singstar: Sigur Ros ætti því svo sannarlega að vera til þess fallin að auka hróður hljómsveitarinnar, enda um heimsþekkt vörumerki að ræða, sem iðulega selst í bílförmum.
Útgáfa Singstar: Sigur Ros hefur vitaskuld vakið talsverða athygli innan íslensku landsteinanna. Sá orðrómur hefur kvisast út að Sena hafi í hyggju að gefa út Singstar: Veðurguðirnir fyrir næstu jól. Sá diskur mun til að mynda innihalda lögin kunnu, „Bahama“, „Drífa“ og „Vinurinn“, en að auki eitt splunkunýtt lag úr smiðju Ingós, sem nefnist „Hanskinn“. Þá hafa einnig heyrst raddir um mögulegan Singstar: Gylfi Ægisson en ekkert hefur fengist staðfest í þeim efnum. |
