|
||||
| Eiður Smári gerir varamannabekkinn „kósý“ fyrir úrslitaleik Meistaradeildarinnar |
 EIÐUR Smári Guðjohnsen, leikmaður Barcelona og íslenska landsliðsins í knattspyrnu, situr ekki auðum höndum í undirbúningi Barcelona-liðsins fyrir úrslitaleik meistaradeildarinnar gegn Manchester United. Hann hefur undanfarna daga unnið hörðum höndum við að gera varamannabekkinn á Ólympíuleikvanginum í Róm sem allra huggulegastan fyrir leikinn.„Fólk kannski áttar sig ekki alltaf á því að það er ekki síst vinnan að tjaldabaki sem máli skiptir í þessu sporti og einkum fyrir mikilvægan leik eins og þennan. Það er mikilvægt að stemmningin innan liðsins sé góð og jafnframt að þegar þreyttum leikmönnum er skipt út af, geti þeir gengið beint í hlýlegt og þægilegt umhverfi á varamannabekknum og þar taki brosandi andlit á móti þeim. Tilgangurinn helgar meðalið og einhver þarf að taka þetta hlutverk - þetta mikilvæga hlutverk - að sér. Og auðvitað er ég boðinn og búinn til þess, enda með reynslumeiri leikmönnum liðisins. Strákarnir í liðinu kalla mig „pabba bekk“ eða „papa banco“ upp á spænskuna,“ segir Eiður hlæjandi. Eiður tekur hlutverk sitt sem umsjónarmaður varamannabekksins afar alvarlega og undirbýr hvern leik af kostgæfni. Fyrir stórleikinn gegn Manchester hefur Eiður fylgt skilvirkri áætlun sem hefst löngu fyrir leikinn. Á æfingum klappar „pabbi bekkur“ mönnum reglulega á bakið og passar að öllum líði vel. Þá eldar hann fyrir strákana á hverjum þriðjudegi. Mikilvægasti undirbúningurinn lýtur þó að „sköpun hins rétta andrúmslofts“ á varamannabekknum. Eiður kemur til leiks með kerti og púða, myndir af fjölskyldumeðlimum leikmanna, pottaplöntur sem hafa róandi áhrif, ýmis krem og smyrsl, reykelsi og litlar gulrætur í poka. Þá reynir hann að koma með eitthvað sérstakt fyrir hvern og einn - til að mynda tekur Eiður alltaf með hlýja peysu fyrir Rafael Marquez, því að hann er frá Mexíkó og verður þess vegna oft svo kalt.  „Ég reyni raunverulega bara að hafa þetta eins „kósý“ og ég get,“ segir Eiður og brosir. „Ég spila alltaf Mezzoforte skömmu fyrir leik, svona til að koma mönnum í gírinn. Garden Party, Four Leaves, eitthvað þannig ... Síðan bregð ég alltaf á tónlist Lay Low úr leikritinu Ökutímar í búningsklefanum fáeinum andartökum áður en gengið er til leiks, hún hefur mjög slakandi áhrif á strákana. Svo má náttúrlega ekki gleyma því að lýsingin á varamannabekknum er afskaplega mikilvæg. Rétt lýsing getur hreinlega unnið leiki. Ég finn til að mynda oft hvernig ég er alls ekki tilbúinn í leikinn þegar ég kem inn á eftir 88 mínútur og lýsingin hefur verið of sterk.“ „Ég legg mig alltaf allan fram og vil spila sem mest en mér líður samt vel þegar ég sé númerið mitt koma upp í þau fáu skipti sem mér er skipt út af undir lok leiks. Þá er svo huggulegt að tylla sér á bekkinn, fá góða peysu, teppi og bók frá Eiði og stundum, þegar ég hef staðið mig vel, laumar hann að mér litlum kanilsnúð sem ég narta í þegar Guardiola þjálfari horfir ekki,“ segir Leo Messi, stjörnuleikmaður Barcelona liðsins. |
