|
||||
| Lebron James hittir þriggja stiga skoti með barni |
 EINKENNILEGT atvik átti sér stað í annarri viðureign Orlando Magic og Cleveland Cavaliers í undanúrslitum NBA-deildarinnar í nótt þegar ungabarni var skotið fyrir utan þriggja stiga línuna og beint ofan í körfuna. Trey Johnson, leikmaður Cleveland, tók innkast í þriðja leikhluta, fékk barnið í hendur frá dómaranum og gaf það um leið á helstu stjörnu liðsins, Lebron James, sem skaut barninu með hnitmiðuðu þriggja stiga skoti, beint ofan í körfuna. Cleveland komst þá í fyrsta skipti yfir í leiknum, 68:70.Ekki er vitað með hvaða hætti barnið barst inn á völlinn. Boltinn þeyttist út af vellinum í þriðja leikhluta og svo virðist sem áhorfandi við hliðarlínuna hafi þóst ætla færa dómara leiksins boltann en fært honum barn sitt í hendur í staðinn. „Ég fékk, að ég hélt, boltann í hendur frá áhorfanda og áferð barnsins svipaði mjög til körfubolta og ég taldi því öruggt að ég héldi á slíkum knetti. Barnið var líka ekki ósvipað körfubolta að lit. Ég rétti því Johnson boltann þegar leikur átti að hefjast að nýju. Það var ekki fyrr en ég sá Lebron James í skotstöðu fyrir utan þriggja stiga línuna að ég áttaði mig á því að barn hafði verið sent inn á völlinn en þá var það um seinan,“ sagði Howard Francesco, dómari leiksins. Barnið sakaði ekki við skotið og var snarlega skipt út fyrir nýjan bolta. Cleveland fór að lokum með eins stigs sigur af hólmi og deila menn nú um hvort stigin þrjú sem fengust þegar ungabarnið hvein í körfunetinu eigi að telja með í heildarstigum Cleveland-liðsins. „Barn eða bolti - það skiptir ekki öllu. Ég veit bara að Lebron skaut einhverju sem leit út fyrir að vera bolti ofan í körfuna og við fengum þrjú stig og unnum leikinn. Annað skiptir mig engu máli,“ sagði Mike Brown, þjálfari Cleveland. Ekki er vitað til þess að barni hafi áður verið skotið ofan í körfu í stað bolta í leik í NBA-deildinni. Heimildir herma þó að möppu þjálfara hafi eitt sinn verið skotið ofan í körfuna í leik fyrir misskilning. |
